الى حبيبي العراق

الى العراق الحبيب


يتعافه الوطن يرجع مثل ما جان
احسن من جديد ويحظن ابناسه
لأن عالي الوطن مهيوب ابو النهرين
للذل والظلم قط ما يطخ راسه
ألف شيطان ادري الرادو ايوكعوه
بعضهم باع عرضه وخاين أحساسه
صح أحزاب عدنه ابكد نجوم الليل
ومو كلهه نزيهه اهواي علاسه
بس واحد كلبنه من الجبل للشط
تعزف عالقوافي ابطلعة أمراسه
عراقي وأفتخر لو أمر كنيسه بيوم
أصلي عالمسيح ابقرعة أجراسه
ابوجه باسم إذا حييت ابو نواس
ما أحب الشرب بس أحترم كاسه
عراقي وأفتخر ما انسه جف عثمان
ذب روحه اعله أخوه وصار غطاسه
يسقط كل مخرب جاي بأسم الدين
وباجر كل منافق يعلن إفلاسه
الكاظم يظل شمعة وتشع بغداد
والكيلاني ثبت بالكلب ساسه
يطوف ابكل حنين ويكصد المنصور
من ورد الرصافة ايعطر انفاسه
يرجع هالوطن شامخ مثل ما جان
شعب واحد يظل ما تفترك ناسه
وغصباً عالزمن تسطع شمس بغداد
والميريد بالحايط يطك راسه

انا اتشرف بكوني اول من رد و اقول لك لقد كان ابي يدرس بالعراق و قد تحدث عنها و قال انها رائعة و قد شهد الحرب فيها و انا احب اهلها جدا

شكرا حبي نورتي الصفحه انتي الاحلى يا عسل